Jan Sampai Manjilek Ludah Surang

"Laki-laki tu nan di pacik kato-katonyo, apo yang talompek dari muluiknyo itu nan ka di patangguang jawabkan jan sampai manjilek ludah surang". Iko nan paliang dipasankan bana dek urang tuo ambo di rumah. Apo sajo nan tajadi jan sampai manjilek ludah surang. Kato-kato adolah pasan, bukan untuak pamenan.

Kalopun namuah banyak macam kato-kato yang semestinyo kalua di wakatu berang tibo. Tapi apo gunonyo mangaluakan kato-kato yang tak bamanfaat ? bialah ditahan sakuek tanago, jan sampai kalua kato-kato nan ka mambuek urang sakik ati. Sakik di awak surang jan sampai jadi sakik pulo di ati urang.

Sajauah mato mamandang, sabanyak kakiko lah malangkah. Yo bana susah untuak manerapkan prinsip nan saketek tu. Bayangkan disaat emosi nan paliang puncak, muluik ko harus tetap ditahan untuak indak mangupek. Walopun ingin bana untuak pembelaan tapi bukan dalam kondisi emosi paliang tinggi. Dado buliah paneh tapi yang namonyo kapalo harus tatap dingin.

Ambo adolah urang nan labiah bapagang pado kato-kato partamo. Apo yang partamo kalua itu yang ambo pacik. Sakali iyo tetaplah iyo ... apo pun nan tajadi. baitu pulo sakali indak... tak kan barubah iyo. Apolai sakali pai... pantang untuak ka babaliak pungguang.