Ranah Minangkabau , Kampuang Nan Jauah di Mato - Payokumbuah Kota Tacinto

Saranah Minang urang banyanyi luruih lah jalan ka Payokumbuah ... Kota nan manjadi pusaik nyo Luhak Limo Puluah Koto, Luhak nan katigo dari asal usul nenek moyang urang Minang. Baa dek tasabuik Luhak Limo Puluah Koto ?

Samanjak Gunuang Marapi sagadang talua itiak, Kareta Api baratok ijuak, pado maso taun alun baralun antah barantah. Tasabuiklah sakelompok manusia barangkek dari basamo-samo manyeba turun dari gunuang Marapi tampek mereka tingga nan kito sabuik kiniko asa nenek moyang urang Minang. Sabab musabab gunuang Marapi acok malatuih-latuih ketek, nan saketek banyaknyo pasti manggaduah ka kehidupan sekelompok manusia ko. Disampiang itu dek katurunan lah samakin banyak pulo nan bahan makanan indak mancukupi karano tanah puncak gunuang susah ditanami... mako disusun lah rencana untuak mancari daerah baru nan katampek tingga yang aman baitu pulo subur dan bisa bacocok tanam. Mako dari saratuih limo puluah urang wakatu itu dipacah manjadi tigo.

Limo puluah urang barangkek ka arah timur nan, Limo puluah urang lai barangkek ka arah utara. Nan Limo puluah sisonyo barangkek ka arah selatan. Ka arah barat ? karano arah barat tu nan nampak lawik ( Samudera Indonesia nan awak sabuik kiniko ) Jadi di khawatirkan indak ado tanah nan subua nan rancak tampek bacocok tanam disinan. Daerah barat tu disabuik lah daerah Pasisia. Itu pulo lah sabab nyo nan saratuih limo puluah urang ko dak dibagi ampek, salain itu saratuih limo puluah dibagi ampek dak bisa adil jumlah nan ka barangkek.

Dimulaih lah ekspedisi ko, sarentak barangkek diwakatu nan samo ka tampek tujuan nan lah ditantukan. "Sabulan sasudah ko kito bakumpua disiko baliak untuak malaporkan daerah baru nan lah kita cari" Baitu pasan tarakhir dari Datuak Pucuak ( Katua Suku Nenek Moyang urang awak ). Ba'da subuah samo-samo barangkek lah nenek moyang wak ko.

Lah lamo perjalanan ampia wakatu sabulan, banyak lah daerah nan baru ka manjadi tampek tingga berikutnyo untuak nenek moyang jo keturunannyo. Baiak dari arah utara, timur, ataupun selatan.
Kito caliak lah katigo kelompok nenek moyang awak ko yang lah mancari tadi...
Nenek moyang kito nan barangkek ka arah selatan, disinan mereka menemukan banyak daerah subur dan cocok bana untuak bacocok tanam, tapi ado sayangnyo ciek ... susah bana mancari daerah nan data... dak ado padang nan laweh disinan. Akhirnyo sabalum pulang daerah tu harus di agiah namo biya takana baeko untuak laporan ka Datuak Pucuak. Dek mancaliak dak ado tanah nan data akhirnyo nenek moyang kito bamufakat diagiah namo Luhak Tanah Data ( Luhak Tanah Datar bahaso Indonesia nyo ) yang artinyo Kurang tanah dan data.

Mancigok ka nenek moyang kito yang barangkek ka arah utara. Dalam perjalan mereka saraso ka daerah dimano disinan balaku hukum rimbo. Sia nan bagak inyo nan manang, atau bisa lah disabuik kurang raso agamo. Acok tajadi kejadian nan dak sasuai jo kitabullah. Tasabuik lah nenek moyang wak ko, talompek dari muluik nyo diwakatu istirahat bakumpua basamo-samo mambahas baa dek bisa co iko, salah seorang nenek moyang wak ko bakato "a yo luhak agamo ko mah". Akhirnyo wakatu panatapan namo daerah tu, lah mambulek kan aia dek pambuluah, kato jo mufakat .. sepakat lah namonyo "Luhak Agam". Kok agam ? bia dak kasa bana tadanga, ingek urang awak diwariskan sifat "Takilek ikan di aia, lah tantu jantan batinonyo" kato-kato basilek, makasuik basindia ... dak ado istilah tembak jenggo... urang awak tu aluiih mainnyo.

Ditaropong pulo nenek moyang awak nan berpetualang ka arah timur. Babeda jo nenek moyang wak sabalumnyo tanah disinan banyak nan data maklum barado di daerah lembah kaki gunuang sago jo bukik barisan, keadaannyo aman-aman sajo dak ado masalah jo agamo. A.. yo pusiang lah nenek moyang wak ko apo lah namo untuak daerah ko. Diagia Tanah Data lah dipakai dek nenek moyang dan ka selatan. Diagiah Agam lah dipakai pulo dek nenek moyang nan ka utara. Tibo lah masonyo bakumpua manjalang ka barangkek pulang. Samo-samo bamupakat .. apolah namonyo daerahko. Sabalum rapek ka dimulai biasonyo katua rapek nenek moyang wak ko maituang jumlah anggota nan barangkek dulu yang sabanyak limo puluah, istilah awaknyo kini di absen ciek ciek. Tapi apo nan tajadi, dari limo puluah nan barangkek sabalumnyo ... tarnyato bakurang ciek. Barulang kali katua maetong tatap sajo jadi ampek puluah sambilan. Ditanyoan ka sado nenek moyang wak nan bakumpua wakatu itu dak ado nan tau ... "ba'a dek luhak limo puluah ko ?" - baa dek kurang limo puluah ko ? Akhirnyo dapek lah ide, diagiah lah namo daerah tu Luhak Limo Puluah. Kamudian wakatu bajalan babarapo waktu yang lalu di tambah lah namonyo manjadi Luhak Limo Puluah Koto. Nan nenek moyang yang ilang ko, sampai kini dak jaleh dimaa nyo tasangkuik.

Luhak Tanah Data bapusat di Batu Sangka, disinan tampek ditamukan urang mancaliak batu diagia sangka.
Luhak Agam bapusat di Bukittinggi, daerah tu yo diateh bukit kalau kiniko wak mancaliak dari kaki janjang ampek puluah mancaliak ka ateh taraso bana tinggi bukit tu, itulah namonyo Bukittinggi.

aa.. nan Luhak Limo Puluah Koto, bapusat di Payokumbuah. Apo tu Payokumbuah ? kalo manuruik bahaso Payo tu rawa, dahulu nenek moyang kito disampiang tanahnyo nan data dak saketek basuo jo daerah payo atau rawa ko. Tapi rawanyo tu beda, apo bedanyo ? aia di payo tu kumuah ... jadi akhirnyo diagiah lah namonyo Payokumuah. Nyak lamak didanga di talingo lamo ka lamoan barubah lah manjadi Payokumbuah, nan bahaso Indonesia raya nyo Payakumbuh.
Ado pulo carito manuruik versi lainnyo, Payokumbuah tu barasal dari kato Payah Tumbuah. Babeda jo daerah Luhak Tanah Data jo Luhak Agam nan dakek jo gunuang marapi yang acok mangaluakan abu kapundan, duo Luhak tu subua tanahnyo. Nan Luhak Limo Puluah tapeknyo di Payokumbuah... aa yo susah tumbuah tanaman disanan wakatu itu. Jadi pernah tasabuik dek nenek moyang wak ko ... Payah Tumbuah disiko yo. Dek perkembangan maso jo wakatu akhirnyo jadilah banamo daerah tu Payokumbuah.

Payokumbuah ... kota nan tasabuik sabagai kota galamai ( makanan khas nan liek-liek dikunyah), kota batiah ( karupuak khas payokumbuah nan badaruak-daruak) kota nan aia nyo janiah mangalia dari batang tabik ikan nyo jinak talatak di lambah Gunuang Sago. Kota nan babudayo Minang nan tamasuak kadalam luhak nan tigo banamo Luhak Limo Puluah Koto. babendera biru, karano kalau mancaliak dari Luhak Agam ataupun di puncak panorama tabek patah nampak mambiru tapampang dipandangan. Luruih jalan ka Payokumbuah co itu pulo luruih urang-urang panghuninyo.

Nan kini payokumbuah lah gagah, rancak dicaliak dimato, banyak kenangan manih bamulai dari kota ko, kota nan tasabuik dek urang tampek balanggang pacu kudo... alun langkok rasonyo kalau ka Payokumbuah dak singgah ka tujuah aia mancua di lambah harau, ai tajun tujuah tingkek di lambah burai, Ngalau nan jadi panyambuik partamo masuak ka kota nan tacinto. Baitu pulo jo gunuang bungsu nan tagak manjago.

Oi.. payokumbuah nan jauah di mato, ibo bana taraso kalau ambo lah bacarito. Hati taragak, badan bakandak basuo jo dunsanak. Tapi apolah dayo, nasib tu bana nan bakato. Iduik di nagari subarang, mancari sawah jo ladang, nan alun bakasempatan pulang ... mudah-mudahan dak tasangkuik badanko di nagari urang, khawatir pulo ambo sampai kiniko masih surang.